StyledEdit

Deskbar:		Applications
Posizion:		/boot/system/apps/StyledEdit
Impostazions:		nissune

StyledEdit al è l'editôr di test sempliç di Haiku. Aben che al salve i file intun formât di test sempliç, a vengin scrits atribûts adizionâi in mût di podê vê capacitâts di formatazion limitadis cuant che si viôt cun StyledEdit.

Se ti interesse, cussì al è ce mût che a parin chei atribûts adizionâi, cuant che si ju esamine tal Terminâl cun listattr:

~> listattr /boot/home/Desktop/test.txt
File: /boot/home/Desktop/test.txt
  Type         Size                 Name
-----------  ---------  -------------------------------
     Int-32          4  "be:encoding"
MIME String         11  "BEOS:TYPE"
     Int-32          4  "wrap"
     Int-32          4  "alignment"
   Raw Data       1048  "styles"

1071 bytes total in attributes.

Di ce che tu puedis viodi, dutis lis opzions di formatazion dal menù di StyledEdit a son presintis: line wrapping (on/off) e alignment (left/center/right), ognidun un atribût. I stîi (caratar, dimension, colôr) di ogni letare a vegnin trasformâts intun altri atribût.

Par vie che chescj atribûts a son une funzionalitât dal filesystem di BFS, chest al significhe che no dome chês altris plateformis a viodaran dome un file di test sempliç, ma al ven fûr che la formatazion e larà pierdude cuant che un file al ven archiviât suntune partizion che no je BFS. I atribûts parsore a vegnin dome tirâts vie e ce che al reste al è l'ordenari file di test sempliç.

Dut câs, e je une biele idee chê di vê la pussibilitât di butà jù test colorât in caratars e dimensions diviersis pûr restant un normâl file di test. Duncje un ReadMe.txt, par esempli, si pues lei intune shell su cualsisei plateforme e vê ancjemò un tic di stîl cuant che si lu viôt in Haiku cuntun dopli-clic.

Però doprâ StyledEdit al è cetant sempliç, o saltarìn di spiegâ ogni element banâl dal menù. Al baste scrivi jù il to test, selezionâ lis peraulis che tu desideris formatâ e aplicâ il caratar, dimension e colôr dal menù Caratar. Rie gnove automatiche e l'inlineâ dal menù Document a funzionin dome su dut il file.