Bash e Scripting

Il "Scripting" e je la tecniche par rindi automatichis lis proceduris, scrivint adun i comants salvant dut su file di test, clamâts "script". Ogni volte che si eseguìs un script, i comants a vegnin elaborâts un daûr di chel altri come se a vignissin inserîts a man intal Terminâl.
I Script a puedin variâ de semplice esecuzion di pôcs comants intun specific ordin a sofisticâts tocs di codiç che al risolf compits complicâts.

Bash

Viodût che i script a fasin naturalmentri afidament su la shell che ju interprete, tu âs prime di familiarizâ cu la BASH che e ven doprade di Haiku. A son tantis risorsis in rêt viodût che e je une shell tant doprade. Un biel document al è chel di Johan Jansson: Introduction to bash - a tutorial for bash under BeOS.
Il Bash Reference Manual (PDF, 720 KiB) e je une risorse ninine par jentrâ tai detais.

La bibie dal Scripting

Dopo vê imparât cualchi nozion di base su ce mût lavorâ te shell, e je ore di fâti rilassâ intal mont dal scripting. Di gnûf, tu cjatarâs cuintâi di lezions e materiâi di riferiment in rêt e intes negozis di libris. Une ce tant biele introduzion, che in pratiche e je fate su misure par Haiku, e je chê disponibile in rêt: Scripting Chapter (PDF, 900 KiB) de BeOS Bible di Scot Hacker.

Script in Haiku

Haiku, timp indaûr, al veve dai script par inviâsi e par distudâsi. Vuê, al lôr puest, al dopre il launch_daemon. Dut câs, l'utent al pues ancjemò miorâ chest procès cun determinâts script-utent. Se no esistin za, tu varâs di creâ di bessôl i file che a coventin. In câs contrari, al baste zontâ i tiei comants dulà che tu ju desideris eseguîts dilunc il procès .

Il UserBootscript

/boot/home/config/settings/boot/UserBootscript al vignarà eseguît dopo che il sisteme al varà finît i siei procès di inviament. Par esempli, tu puedis inviâ un ciert numar di programs che a vignaran fats partî in automatic a ogni inviament di sisteme:

# Start LaunchBox
/boot/system/apps/LaunchBox &

# Start Workspaces Applet
/boot/system/apps/Workspaces &

Visiti di finî un comant cuntun "&" par inviâlu come procès in sotfont, o il script si fermarà fintremai che il comant nol varà finît di lavorâ (in chest câs: la aplicazion inviade e je stade sierade).

Une semplice alternative par inviâ aplicazions al inviament, rispiet a ce che o ven mostrât chi parsore, e je chê di meti i lôr colegaments inte cartele /boot/home/config/settings/boot/launch. Chest al pues jessi fat semplicementri fasint clic diestri su la aplicazion che tu desideris vê inviade in automatic, e lâ su Cree colegament e daspò navigâ fin te cartele che o ven nomenât chi parsore.

Il UserShutdownScript - ancjemò nol funzione

/boot/home/config/settings/boot/UserShutdownScript al vignarà eseguît come prin pas intal procès di distudament. Se il script al torne un stât di jessude diviers di zero, il distudament al vignarà interot.

Il UserShutdownFinishScript - ancjemò nol funzione

/boot/home/config/settings/boot/UserShutdownFinishScript al è eseguît come ultin pas tal procès di distudament. Fâs câs che la plui part dal sisteme al è stât terminât cuant che chest script al ven eseguît.