Scurtis e cumbinazions di tascj
In maniere predefinide, il tast di scurte di Haiku, par esempli, par clamâ i comants dai menù, nol è il solit CTRL, ma ALT. Chest al à resons storichis, par vie che BeOS si ispirave intune cierte maniere a MacOS. Dopo che tu ti abituis, al à i siei vantaçs come p.e. ALT C e ALT V si integrin te stesse maniere inte shell bash dal Terminâl, dulà che CTRL C al fâs terminâ il procès in esecuzion.
In ogni câs, tu puedis passâ, a chel che al podarès jessi plui familiâr, tast CTRL intes preferencis di Mape tastiere. La vuide utent e descrîf simpri la configurazion predefinide che e je chê cul tast di comant ALT.
Se no tu sâs cuai tascj che a son i tascjOPZ o MENÙ te tô particolâr mape-tastiere/disposizion-di-tastiere, dopre ancje chì lis preferencis di Mape tastiere. Lì tu puedis viodi cuale pression di tast e ven mandade cuant che tu frachis un tast de tastiere.
Scurtis gjenerâls
Chi e je une tabele cun tantis des plui dopradis scurtis simpri disponibilis, ancje se nol esist un menù corispondent:
| ALT Fx | Al passe al Spazi di lavôr X (Fx al è il tast funzion corispondent a chel spazi di lavôr). Puarte con te barcon atîf fracant ancje MAIUSC | |
| CTRL ALT ← / → / ↑ / ↓ | Al navighe tra lis riis/colonis dai spazis di lavôr disponibii. Zonte MAIUSC par puartâ cun te il barcon atîf. | |
| OPZ | Tignint fracât OPT intant che si strissine un barcon dongje di une altre lenghete di barcon o dal ôr, jù intassarà opûr intasselarà (viôt il cjapitul Interface grafiche di Haiku). | |
| OPZ ↑ / ↓ | Al passe, un daûr di chel altri, ai barcons vierts intal spazi di lavôr atuâl. | |
| CTRL ALT + clic di çampe | Clic e strissinâ cul boton di çampe dal mouse par spostâ un barcon (viôt il cjapitul Interface grafiche di Haiku). | |
| CTRL ALT + clic di diestre | Clic e strissinâ cul boton di diestre dal mouse par ridimensionâ un barcon (viôt cjapitul Interface grafiche di Haiku). | |
| CTRL ALT Z | Al ingrandìs un barcon a une dimension alternative (pe plui part des aplicazions e je la dimension massime). | |
| CTRL ALT M | Al minimize il barcon atîf. | |
| CTRL ALT H | Al plate (minimize) ducj i barcons de aplicazion ative. | |
| CTRL ALT F | Al sburte denant il barcon atîf (si pues fâ dome cu la impostazion dal mouse su Focalizazion daûr dal mouse). | |
| CTRL ALT B | Al mande daûr il barcon atîf. | |
| CTRL TAB | Ten fracât par fâ vignî fûr il Twitcher. | |
| CTRL ALT CANC | Al vierç il Monitor dai Team. | |
| ALT ESC | Al jentre te sbare dai menù (par lassâle ESC). | |
| ALT C | Al copie intes notis la selezion. | |
| ALT X | Al taie metint intes notis la selezion. | |
| ALT V | Al tache il contignût des notis. | |
| ALT W | Al siere il barcon atîf. | |
| ALT Q | Al jes di une aplicazion. | |
| STAMP | Al cjape une schermade cun zero ritart e al invie il panel Cature di schermi. | |
| MAIUSC STAMP | Al cjape une videade cence dî nuie (cence vierzi il panel), ma simpri rispietant lis ultimis impostazions dopradis. | |
| CTRL STAMP | Al cjape ancje lui une videade cu lis impostazions salvadis, ma invezit di salvâle come un file, e ven dome copiade intes notis. |
Scurtis pe modifiche dal test
Ogni volte che tu modifichis i tescj – sedi cambiâ non a un file in Tracker, modificâ un file in StyledEdit, o chatâ in Vision – si à cualchi scurte universâl:
| ALT ← / → o OPZ ← / → | Salte di peraule in peraule. (Note: al podarès jessi util abituâsi a doprâ la cumbinazion OPT. Cussì tu sês pront tal câs che cualchi aplicazion e dopredi za la cumbinazion ALT par cualchi altri comant.) | |
| ALT BACKSPACE(cessâ) o OPZ BACKSPACE(cessâ) | Scancelament peraule par peraule a çampe dal cursôr. | |
| ALT CANC o OPZ CANC | Scancelament peraule par peraule a diestre dal cursôr. | |
| INIZI | Al salte al inizi de rie. | |
| FIN | Al salte ae fin de rie. | |
| ALT INIZI | Al salte al inizi dal document. | |
| ALT FIN | Al salte ae fin dal document. |
Tignint fracât ancje MAIUSC cuant che si dopre lis cumbinazions di tascj chi parsore, al selezionarà il test tra i salts dal cursôr.
Scurtis pe navigazion cun Tracker
In zonte aes scurtis gjenerâls, chi si à cualchidune in plui pe navigazion cun Tracker:
| ALT ↑ | Al vierç la cartele superiôr. | |
| ALT ↓ o INVIE | Al vierç la cartele selezionade. | |
| OPZ | Tignintlu fracât intnat che si vierç une cartele, al sierarà in automatic la cartele superiôr. Chest al funzione ancje cuant che si navighe cul mouse. | |
| MENÙ | Al vierç il menù dal Deskbar (molilu cun ESC). | |
| ALT Z | Al disfe la ultime azion. La cronologjie “disfe” e je limitade dome de cuantitât di memorie disponibile. Fâs câs che chest al funzione dome pes azions sui file stès, lis modifichis ai atribûts e ai permès no puedin jessi disfatis in cussì. In diplui, une volte eliminât un file de Scovacere al è lât par simpri. | |
| ALT MAIUSC Z | Al torne a fâ la azion che si veve apene anulât ALT Z. | |
| MAIUSC + Rudiele dal mouse | Cuant che si scor une lungje liste di file intun barcon di Tracker o cuant che tu stâs sgarfant tai sot-menù, chest al sveltìs lis robis fasint un scoriment pagjine par pagjine. |
Scurtis tal Terminâl
| ALT + clic di çampe | Se tu fasis clic di çampe suntun percors o un URL intant che tu tegnis fracât ALT si vierzarà te aplicazion preferide, p.e. lis cartelis in Tracker, lis imagjins in MostreImagjin. Tu puedis limitâ il percors selezionât tignint fracât ancje MAIUSC. | |
| ALT N | Al vierç une altre session di Terminâl intun gnûf barcon. | |
| ALT T | Al vierç une altre session di Terminâl intune gnove schede. | |
| ALT 1, 2, 3 ... | Al passe ae schede corispondente. | |
| ALT TAB | Al passe al barcon di Terminâl sucessîf. | |
| MAIUSC ← / → | Al passe ae schede a çampe/diestre. | |
| ALT MAIUSC ← / → | Al sposte la schede atuâl a çampe/diestre. | |
| ALT + / - | Aumente/Diminuì la dimension dal caratar. | |
| ALT INVIE | Jentre/jes te/de modalitât plen visôr. | |
| MAIUSC ↑ / ↓ | Al scor sù/jù di une rie tal output dal Terminâl. | |
| MAIUSC Pagj↑ / Pagj↓ | Al scor sù/jù di une pagjine tal output dal Terminâl. | |
| TAB | Completament-tab. Dopo vê inserît cualchi letare, frache TAB une volte par completâ in automatic un non di file o un percors. Se e esist plui di une corispondence, lui al ferme di scrivi dulà che il non al tache a vê diferencis e tu tu varâs di indicâ cualchi letare in plui par distinguiju. Tu puedis ancje fracâ dôs voltis TAB par vê dute la liste des corispondencis. | |
| ↑ / ↓ | Al va in sù o in jù te cronologjie dai comants inserîts in precedence. | |
| CTRL R | Cronologjie di Bash. Ducj i comants che tu inserissis a vegnin archiviâts intal file ~/config/settings/bash_history. Frache CTRL R e scomence a inserî un comant, ti vignaran dadis lis primis cumbinazions che a coincidin de cronologjie di bash. Continue a fracâ CTRL R fintremai che tu cjatis la rie di comant juste e frache INVIE par eseguîle. | |
| CTRL C | Al ferme il comant cumò in esecuzion. | |
| CTRL D | Al siere la session atuâl dal Terminâl. |
Altris cumbinazions di tascj
Tu puedis zontâ o gjavâ elements a/di une selezion tignint fracât un tast modificadôr intant che tu fasis clic suntune vôs (o file tal câs di Tracker).
| MAIUSC | Chest al selezionarà dut tra il prin element selezionât e chel che tu i âs fat clic. | |
| ALT | Al zonte, o al gjave, l'element che tu i stâs fasint clic ae (o de) selezion. |
Intun barcon di Tracker, se tu tachis a scrivi, Tracker al scor e al selezione il file che plui al seme ae tô ricercje incrementâl. Se no si à nissun file che al tache cu lis letaris digjitadis, a vegnin selezionâts i file che a contegnin in cualsisei part dal lôr non, o dai atribûts visualizâts, la stringhe di ricercje. Cheste ricercje no je sensibile aes maiusculis/minusculis.
Lis letaris che tu scrivis a vignaran fûr in bas a çampe, dulà che di solit al ven scrit il numar dai elements listâts. Dopo un secont alt torne indaûr e tu puedis tacâ une gnove ricercje incrementâl.
Al puest di saltâ al prin câs che al corispuint ae stringhe di ricercje, Tracker al pues jessi configurât in mût di filtrâ vie ducj i file che no corispuindin. Viôt l'argoment filtri scriture anticipade.