Aspiet

Deskbar:		Preferences
Posizion:		/boot/system/preferences/Appearance
Impostazions:		~/config/settings/system/app_server/appearance ~/config/settings/system/app_server/fonts

Lis preferencis di Aspiet ti permetin di cambiâ cualchi aspiet de part visuâl di Haiku.

Caratars

Haiku al definìs trê caratars standard par diferentis finalitâts. Tu tu stabilissis lis dimensions e i gjenars dai caratars fis, neret e normâl che a vignaran doprâts sul sisteme. Sore chescj, e je ancje une impostazion separade pal caratar doprât tai menù.

Instalazion di gnûfs caratars

I gnûfs caratars che no rivin come part di un pachet .hpkg regolâr, a puedin jessi instalâts se tu ju copiis intune sot-cartele, in acuardi cul lôr gjenar di caratar(otfonts, psfonts o ttfonts), inte lôr rispetive cartele non-packaged (viôt l'argoment Disposizion dal filesystem). Pai caratars TrueType al sarà:

/boot/system/non-packaged/data/fonts/ttfonts/		par caratars disponibii par ducj i utents.
/boot/home/config/non-packaged/data/fonts/ttfonts/		par caratars disponibii dome pal to utent.

Colôrs

Inte schede Colôrs, tu puedis cambiâ i colôrs di diferentis parts de interface utent. Il colôr al acete ancje il strissine e mole di altris programs, permetint cussì di strissinâ parsore i colôrs, par esempli, di WonderBrush, Icon-O-Matic o il panel Fonts.

Se tu ativis la casele di selezion Sielç in automatic i colôrs secondaris, la liste dai colôrs de interface utent e ven ridote a:

Fonts dal panel		predefinît: grîs
Sbare di stât		predefinît: blu, doprât p.e. par delineâ il widget atîf come un boton o une liste
Lenghete dal barcon		predefinît: la iconiche lenghete di barcon zale

Cun cheste impostazion ducj chei altris colôrs a vegnin stabilîts in automatic. Par esempli, il colôr dal test al devente blanc se tu sielzis pal panel un colôr scûr.

Tu puedis ancje sielzi prime chei trê colôrs primaris e lassâ che il sisteme al configuri di conseguence i colôrs secondaris rispetîfs, dopo gjavâ la casele di selezion e regolâ un dal un i colôrs.

Decoradôrs dai barcons

I decoradôrs a determinin l'aspiet e il compuartament dai barcons e di ducj i elements de interface utent grafiche. Pal moment Haiku rive cun dome un decoradôr predefinît. Se tu vessis di cjatâ e instalâ altris decoradôrs, tu podarâs sielzi un diferent dal menù a tende.

Il decoradôr predefinît di Haiku al permet di stabilî il stîl des frecis de sbare di scoriment: o frecis singulis ae fin des sbaris di scoriment par sparagnâ spazi, o doplis frecis — la maniere tradizionâl di BeOS — che potenzialmentri a sparagnin un pôcs di spostaments di mouse cuant che si scor sù e jù o çampe e drete...

Antialiasing

La schede Antialiasing e furnìs variis impostazions su ce mût che lis robis a vegnin visualizadis sul schermi.

Miorament dai glifs

Un Miorament dai glifs ativât al inlinee dutis lis letaris in mût che i lôr ôrs, verticâi e orizontâi, a restedin juste jenfri doi pixel. Il risultât al è un contrast perfet, in particolâr cuant che si à a ce fâ cul blanc e neri. Il test al aparìs plui net. E je ancje une impostazion dome par caratars a spaziadure fisse che e jude soredut cui dispositîfs a basse risoluzion come i netbook. I caratars piçui a puedin aparî brututs cuant che il miorament al è ativât, ma cun cheste impostazion si varà in ogni câs il vantaç dal miorament pai editôrs di test e pal terminâl.

Viôt la diference fate dal miorament in chestis caturis di schermi ingrandidis:

Miorament: disativât

Miorament: ativât

Al va evidenziât ancje che ducj i barcons di Magnify in cheste pagjine a son visualizâts cu lis varis opzions. Cussì si pues vê une impression gjenerâl e reâl des impostazions, confrontant par esempli il titul de schede in neret o il test "33 x 15 @ 8 pixels/pixel".

Gjenar di antialiasing

Une altre tecniche par miorâ la visualizazion e je l' Antialiasing, che al supuarte dute la grafiche vetoriâl e il test. Al pulìs lis liniis cambiant il colôr di cierts pixel. A son doi metodis par fâlu:

Scjale di grîs al cambie la intensitât dai pixel tal ôr.
Sub-pixel LCD al fâs un lavôr ancjemò miôr, in particolâr cui visôrs LCD (a elevade risoluzion). Al puest de intensitât di un pixel, al cambie il so colôr; chest al sposte un ôr di une frazion di pixel, parcè che i schermis LCD a produsin ogni pixel cuntun component ros, un vert e un blu.

Di gnûf, i doi diferents metodis cu lis caturis di schermi ingrandidis:

Scjale di grîs, Miorament glifs: disativât

Sub-pixel LCD, Miorament glifs: disativât

L'Antialiasing basât su sub-pixel al da un lizêr lusôr colorât ai ogjets. Une robe che no plâs a ducj. In Haiku tu puedis miscliçâ i doi metodis di antialiasing e cjatâ la tô juste impostazion, doprant un cursôr.

Cheste e je une ombre di cemût che il Sub-pixel LCD al pâr rispiet ae Scjale di grîs:

Scjale di grîs, Miorament glifs: ativât

Sub-pixel LCD, Miorament glifs: ativât

In bas tal panel a son doi botons:

Predefinîts		al torne a puartâ dut ai valôrs predefinîts.
Torne indaûr		al puarte indaûr lis impostazions a chês che a jerin ativis cuant che si à inviât lis preferencis Aspiet.