cli-app-icon_64.pngAplicazions a rie di comant specifichis par Haiku

Posizion:/boot/system/bin/
/boot/system/non-packaged/bin/
~/config/bin/
~/config/non-packaged/bin/


Dutis lis aplicazions a rie di comant distribuidis cun Haiku a son in /boot/system/bin/. Ancje lis tôs o lis aplicazions instaladis in zonte a vignaran fûr lì, o in ~/config/bin/, cuant che a vegnin instaladis di un pachet .hpkg. In alternative tu puedis metilis in /boot/system/non-packaged/bin/ o ~/config/non-packaged/bin/. Dutis lis posizions a fasin part de variabile PATH e duncje a vegnin cjatadis in automatic.
La liste chi sot no je esaustive di dutis lis aplicazions a rie di comant specifichis di Haiku, e serf dome a evidenziâ cualchidune des plui utilis, juste par dâti une cerce. No sta vê pôre di esplorâ di bessôl ce che al sta intes cartelis bin/. Eseguint une aplicazion cul parametri --help al mostrarà l'ûs dal comant e dutis lis sôs varis opzions.

index Corelâts ai atribûts: listattr, catattr, addattr, rmattr, copyattr

Chescj comants a son doprâts par mostrâ, lei, zontâ e gjavâ atribûts dai file. Visiti che chescj meta-dâts a son pal moment disponibii dome sui volums formatâts in BFS. Spostant i file suntun altri filesystem ducj i atribûts a laran pierdûts!
Ducj chescj comants a son descrits intal argoment Atribûts tal Terminâl.

index Corelâts ae tabele: lsindex, mkindex, reindex, rmindex

Cun chescj comants tu listis, fasis, tornis a meti in tabele e gjavis i atribûts ae tabele di BFS. Ogni volum al à la sô tabele, visital cuant che tu copiis i file di un volum a chel altri.
Chescj comants a son descrits intal argoment Tabele.

index Corelâts ae gjestion dai pachets: package, pkgman

Il comant package al ven doprât par gjestî i pachets HPKG. Bute un voli al articul Instalazion des aplicazions par imparâ lis basis. Di solit il strument haikuporter al ven doprât par creâ in automatic i pachets di ce che o clamin ricetis (recipes).

pkgman al ven doprât par cirî, instalâ, inzornâ e disinstalâ pachets. I dipuesits dai pachets a puedin jessi zontâts, scartâts e inzornâ la liste dai lôr pachets. Un speciâl gjenar di inzornament al è invocât cul parametri full-sync: al è plui agressîf e, se al covente, al degrade o al gjave i pachets.
Par vê plui detais suntun parametri, zonte "--help", p.e. pkgman search --help

index Utii comants pal scripting

Chi a son cualchi strument a rie di comant che a son utii soredut pal scripting (viôt ancje l'argoment Bash e Scripting).

alert

alert al evoche il tipic barcon di alerte cuntune icone predefinide, test esplicatîf e fin a trê botons. Al tornarà il titul dal boton fracât e un stât di jessude (tacant cun 0). Par esempli, chest al è fat de rie:

alert --idea "FantasticApp(tm) installed successfully! \
Would you like a link to it?" "On Desktop" "In Deskbar" "No thanks"

cli-alert.png

filepanel

filepanel al mostre un panel par salvâ o cjariâ file e al permet al utent di sielzi un file o une posizion. Come valôr tornât tu varâs il file sielt o il percors de cartele sielte. A son disponibii diviers parametris, par esempli stabilî une cartele iniziâl, un titul pal barcon, un non predefinîtpar salvâ o restrizions sui gjenars di file. Chest al è un esempli di

filepanel -s -t "Save your logfile" -d ~/config/settings -n Fantastic.log

cli-filepanel.png

hey

hey al è un piçul strument di jutori che al invie BMessages aes aplicazions e al stampe la lôr rispueste. Al pues jessi doprât pal scripting des aplicazions, p.e. "control rimot" di un program di un script o de rie di comant. Il so ûs al è un tic complicât... Il post tal blog di Humdinger al zove come une buine introduzion e, gracie ae BeOS Bible di Scot Hacker, e je une lezion su hey di Chris Herborth, une vore plui complete.

notify

notify al mostre un panel di notifiche cuntun messaç. A son varis parametris che a son descrits cuant che tu clamis notify --help. Une notifiche e pues ancje jessi doprade par mostrâ l'avanzament di cualchi azion. Cuant che si lu fâs, al è imppuartant configurâ un messageID e doprâlu simpri cuant che si inzorne l'avanzament (un numar a virgule mobile tra 0.0 e 1.0 che al ven scrit come percentuâl). In câs contrari tu viodarâs diviers panei di notifiche se l'inzornament al è plui veloç dal timp di durade de notifiche stabilît.
Un esempli:

notify --type progress --group "--group" --title "--title" --icon /boot/home/bebook.hvif \
--messageID MyMessageID --progress .75 "Keep waiting"

cli-notification.png

query

query e je la version a rie di comant dal panel Cjate. Di fat, une maniere veloce par gjenerâ il tiermin di ricercje e je chê di costruî une interogazion intal panel Cjate, passâ a par formule, zontâ lis doplis virgulutis (") denant e daûr e tacâ dute la stringhe dopo dal to comant query intal Terminâl o tal to script.

waitfor

waitfor e je une maniere ninine par spietâ che e partissi o che e finissi une particolâr aplicazion o thread.

index Altris comants

checkfs

checkfs al è un strument impuartant par controlâ eventuâi erôrs sul to filesystem. Al baste zontâ un non di volum come /Haiku o un percors di dispositîf e lui al passarà par ogni file par corezi incoerencis, dulà che al è pussibil.

desklink

desklink al pues instalâ une icone par cualsisei file, cartele, interogazion o aplicazion inte guantiere Deskbar. Al ufrìs ancje la opzion par furnî un menù contestuâl cuant che si fâs clic diestri suntune icone par eseguî azions speciâls. Come esempli, prove chest par zontâ la aplicazion de rie di comant screenshot cun varis opzions (la "\" inte prime rie e je dome par vê la rie di interuzion tal Terminâl):

 desklink "cmd=Active window (2s):/bin/screenshot --window --border --delay 2" \
"cmd=Remove replicant:desklink --remove=screenshot" /bin/screenshot

cli-alert.png

diskimage

diskimage ti permet di regjistrâ un file regolâr come dispositîf disc. Par sempli, tu puedis regjistrâ une imagjin anyboot di Haiku, montâle in Tracker e lì copiâ, modificâ o gjavâ file prime di doprâle come sorzint intal Instaladôr.

launch_roster

Il launch_daemon al invie ogni sorte di servizi e aplicazion al inviament dal sisteme. Par cualchidun al è stât istruît in mût che al torni a inviâju se a jessin. Se no tu desideris che al funzioni cussì – magari tu vuelis provâ une version modificade di Tracker, par esempli – tu dopris launch_roster par fâ il stop dal tornâ a inviâ la aplicazion prime che e jessî. In maniere simile, tu puedis fâi di gnûf il start o otignî info in merit. Il parametri log al stampe un regjistri di ducj i events relatîfs a launch_daemon.
Cence parametris, launch_roster al liste dutis lis aplicazion/servizis che a stan sot dal so control.
Par esempli, chest al fermarà di tornâ a inviâ il Deskbar:

launch_roster stop x-vnd.be-tskb

mountvolume
mount

mountvolume al ven preferît di tancj par montâ discs e partizions locâi, parcè che il so ûs al è ce tant sempliç: al baste clamâlu cul non de partizion e il zûc al è fat. Prove --help par vê plui opzions.

mount al pues ancje montâ discs rimots doprant un filesystem di rêt, come NFS4. Tu specifichis il filesystem doprât cul parametri -t e la posizion rimote cul parametri -p . Come parametri di filesystem tu puedi doprâ dut ce che tu cjatis in /system/add-ons/kernel/file_system (e lis gjerarchiis dai file corispondents sot ~/config o "non-packaged", che ben si intint). Tu âs ancje di creâ une cartele come pont di montaç. Chi al è un esempli:

mkdir -p /DiskStation
mount -t nfs4 -p "192.168.178.3:volume1" /DiskStation

open

open al è un piçul strument une vore comut. Cun chel tu vierzis cualsisei file cu la sô aplicazion preferide, o inviâ une specifiche aplicazion par mieç de sô firme, cence savê la sô esate posizion. Al funzione ancje cui URL e adiriture cu lis cartelis "virtuâls" . pe cartele atuâl e .. par chê superiôr, vierzint la cartele in Tracker.

ramdisk

Un ramdisk al è come un disc fis dome che al zire inte memorie ram dal computer. Chest lu rint une vore veloç ma ancje volatil, parcè che il so contingût si sfante cuant che tu distudis il computer, o al colasse o e salte la curint.
Par creâ un ramdisk di 1 GiB, formatâlu cul non "RAMses" e montâlu, scrîf chest tal Terminâl o cree un script:

ramdisk create -s 1gb
mkfs -q -t bfs /dev/disk/virtual/ram/0/raw RAMses
mountvolume RAMses

Note: cuant che si cree un ramdisk, il comant ramdisk al stampe il percors di chel apene creât. Se tu creis diviers discs, il percors /dev/disk/virtual/ram/0/raw al cambiarà!

Par conservâ il contignût, infûr che a capitedin calamitâts come un blackout e robis dal gjenar, un ramdisk al pues jessi configurât par lei/scriviune imagjin sul disc fis. Par chel, tu scugnis indicâ un file, de dimension desiderade, che al vignarà let ogni volte che tu inviis il to ramdisk, e scrit cuant che tu lu dismontis. Par creâ un file imagjin "RAMimage" di 500MiB e formatâlu, fâs cussì:

dd if=/dev/zero of=RAMimage bs=500M count=1
mkfs -q -t bfs /dev/disk/virtual/ram/0/raw RAMimage

Di cumò indenant, tu inviis il ramdisk cussì:

ramdisk create RAMimage
mountvolume RAMimage

Al è une vore impuartant dismontâ simpri in maniere nete il to ramdisk, sedi dal Tracker opûr cun unmount /RAMimage, in câs contrari lis modifichis no vignaran scritis su pal file imagjin!

screenmode

Chest comant al configure la modalitât dal schermi (risoluzion, profonditât colôr, frecuence di inzornament). Di norme, tu ju configuris tes preferencis dal Schermi. U altri parametri lu rint util in cumbinazion cu lis preferencis des Scurtis: p.e. --brightness +3 al incrès la luminositât di "3". Util par cambiâ la iluminazion par daûr cuntune cumbinazion di tascj.

setvolume

Chest comant al configure il volum su la jessude principâl di sisteme. Sore a valôrs specifics in dB, tu puedis indicâ --togglemute (comute cidin), --mute (cidine) o --unmute (ative sun) e --increase (auemnte) o --decrease (diminuìs) il volum. Util par assegnâ lis cumbinazions di tascj cu lis preferencis des Scurtis.